تتصرف ازاي لو كلبك جاتله ضربة شمس


تتصرف ازاي لو كلبك جاتله ضربة شمس

من اهم الحاجات اللي ممكن ننساها أثناء السفر على البحر والمناطق الساحلية هي احتمالية إن كلبك تجيله ضربة شمس. مش كل الكلاب بتحب السباحة. لو هتقضي يومك كله على البحر يجب مراعاة الآتي عشان كلبك ماتجيلوش ضربة شمس

تفادى النزول بيه وقت الحر الشديد.  بلاش الأوقات اللي درجة الحرارة مرتفعة فيها بالذات لو مش بيحب السباحة. الرملة بتكون درجة حرارتها سخنة عليه
وفرله مكان ضل ويفضل إنك تتأكد إن المكان ده مبلل بالماء عشان مايقعدش على رملة سخنة
وفر له ماء للشرب في كل الأوقات
لو بيحب السباحة وبيعرف يعوم شجعه على نزول البحر معاك
لو مش بيحب البحر والسباحة بل جسمه ورأسه بالماء الفاتر  على الاقل مرة كل ساعة عشان تقلل من احساسه بالحر
ماتسبهوش في عريبة مركونة حتى لو الشبابيك مفتوحة

أعراض إن كلبك بدأت تجيله ضربة شمس
ينهج كتير وبسرعة أكثر من المعتادة
ريالة كتيرة ولزجة بمعدل اكثر من المعتاد
لون اللثة يكون أحمر باهت
لون اللسان يكون أحمر فاتح
يبان عليه التعب وعدم القدرة على اللعب أو الحركة

ومن الأعراض الشديدة اللي تستدعي إنك تكلم الطبيب البيطري فورا
بالاضافة إلى كل الأعراض السابقة
عدم القدرة على التركيز
اغماء
قيء واسهال

لو شوفت في كلبك بداية اعراض ضربة الشمس .. عليك بالآتي فورا
يجب مراعاة إن محاولة تبريد جسمه لازم تكون بالتدريج لإن التبريد المفاجئ ممكن يسبب صدمة لجسمه ويكون مضر جدا عليه
انقله فورا لمكان مكيف أو مكان فيه ضل وتيار هواء أو مروحة
حاول تشربه ماء فاتر من الحنفية بكمية قليلة في الأول. ماتشربهوش ماء مثلج أو كمية كبيرة في الأول
لو حسيته مش قادر يشرب بلاش تضغط عليه
بل رأسه وجسمه بالماء الفاتر أو بفوطة مبللة معصورة
حاول تديله أي حاجة مرطبة زي علبة زبادي. لو مش قادر بلاش تضغط عليه

لو عايز تعرف نصايح للعب الكلاب على الشاطئ اضغط الرابط ده
لو عايز تعرف تعمل إيه لو كلبك ضاع منك أثناء السفر اضغط الرابط ده

Leave a comment