اخطار الديازينون على بيتك وأسرتك


اخطار الديازينون

في كتير من الأحيان خصوصاً في البيوت اللي فيها كلاب ، الناس بتلجأ للديازينون كمبيد حشري للتخلص من القراد والبراغيث. للأسف المبيد ده خطر جداً عليك وعلى أولادك وعلى كلبك.

ما هو الديازينون ؟

الديازينون هو نوع من الكيماويات بينتمي لعائلة الفوسفات العضوي. بيستخدم كمبيد حشري لطرد الحشرات و الآفات من المحاصيل زي الخضار والفاكهة. النوع ده من الكيماويات لسة بيستخدم في المزارع بس إتمنع تماماً من الاستخدام في البيوت كوسيلة لطرد الحشرات سنة 2004 في الولايات المتحدة لأن له مخاطر كتير جداً على البشر و الحيوانات.

ازاي الديازينون بيشتغل؟

الديازينون بيشتغل بصورة مباشرة على الجهاز العصبي. الديازينون بيأثر على الكيماويات اللي بتخلي الجهاز العصبي يشتغل بصورة طبيعية ، فبيؤدي إلى فقدان السيطرة عليه، و إلى مخاطر كتير منها:

– فقدان الشهية

– السعال

– الإسهال

– آلام في المعدة، والقيء

وفي الحالات القصوى:

– تصلب أو تشنج في العضلات

– سرعة دقات القلب

– ضيق في التنفس

– غيبوبة

– موت

في دراسات اتعملت على الحيوانات و اثبتت إنه كمان بيؤثر على البنكرياس و لو تم التعرض لمدة طويلة ممكن يؤثر على النمو بشكل كبير.

الديازينون بيأثر على الناس زي الحيوانات بنفس الصورة لأنه بيؤثر على نفس الحاجة – الجهاز العصبي. تأثيره بيبان من 30 دقيقة ل-72 ساعة. 

طبعاً ده لازم يفتح عيونا أكتر على إستخدام المبيد ده. يعني حتى لو الكلب عنده حشرات في أدوية كتير و طرق أحسن ممكن نستخدمها بدل ما نعرضهم لخطر  زي الشامبوهات المخصصةللقضاء على القراد  والبراغيث والأدويه اللي ممكن تسأل عليها الدكتور.

لمعرفة كيف تعالج كلبك من القراد والبراغيث إضغط الرابط ده 

وشوف كمان كيف تتخلص من القراد والبراغيث في البيت أو الجنينة أو العربية 

 كتابة فرح خالد 
المصادر : National Pesticide Information Center –  ATSDR 

Leave a comment