كيفية تطهير بيتك من القراد والبراغيث

2


محاربة القراد والبراغيث من أصعب التحديات اللي بتقابل مربي الكلاب. في المقالة دي هنتكلم على كيفية القضاء على القراد والبراغيث في البيت

أول خطوة للقضاء على الحشرات الطفيلية في البيت هي علاج كلبك. كنا اتكلمنا على خطوات التخلص من الحشرات عند الكلاب في المقالة دي

كقاعدة عامة لازم يكون فيه تنظيف دوري للبيت بمعدل كل يومين. الموضوع ده بيتطلب مجهود ومواظبة لكنه أفضل بكثير من اللجوء للسموم القاتلة مثل الديازينون اللي ضررها شديد جدا على أفراد أسرتك وكلبك


استخدام المكنسة الكهربائية في الأرضيات والسجاد والكنب والسراير مهم جدا. التنفيض لوحده لا يكفي لأنهم عندهم قدرة إنهم يمسكوا في الأقمشة والسجاد بشدة. المكنسة هي الحل ولكن احذر أن الحشرات دي عندها قدرة إنها تزحف تاني جوه بيتك من المكنسة

:لذلك قبل بداية عملية التنظيف بالمكنسة ننصح إنك تضع في قلبها أي من الاتي لضمان قتل الحشرات بعد كنسها
طوق للحشرات. من أي محل لمستلزامات الحيوانات. شوف أقرب محل ليك من الرابط ده
ملح سفرة. القراد والبراغيث بيحبوا الرطوبة ولا يستطيعوا البقاء في مكان جاف. الملح بيعمل عملية تجفيف طبيعية وبيمتص الرطوبة من أي شيء وكمان قاتل للحشرات الطفيلية
بودرة قاتلة للحشرات الزاحفة أو الحشرات الطفيلية
عليك تفريغ محتويات المكنسة بشكل دوري خارج المنزل. ممكن في البلكونة أو الحديقة. ضع المحتويات المفرغة من المكنسة في كيس زبالة واقفله جيدا وتخلص منه


استخدم الديتول كبديل للمبيد  الديتول قاتل للحشرات الطفيلية مثل القراد والبراغيث. هو حل كيميائي لكن أكيد ضرره أقل بكثير من المبيدات السامة مثل الديازينون. املأ عبوة رشاشة بنص ديتول ونص ماء. قوم بالرش تحت الأثاث وفي أركان المنزل و على الستائر كل يومين. الموضوع كله مش هياخد أكثر من ربع ساعة من وقتك. راعي إنك لاتقوم بالرش في الأماكن اللي كلبك ممكن يوصلها أو يلحسها

ملحوظة: الديتول مادة كيميائية منظفة ولا يمكن استخدامه على كلبك وعليك توخي الحذر إن كلبك مايلحسهوش


استخدام الخل في مسح وتنظيف الأرضيات

ننصح بعد الكنس بالمكنسة الكهربائية مسح الأرضيات جيدا بإستخدام ماء دافئ مع كوب من الخل لأنه طارد قوي وآمن للأطفال والحيوانات. وبعد كده سيب شباك مفتوح نص ساعة للتهوية ولتجفيف الأرض


غسيل السجاد و المفروشات والستائر بشكل دوري على الأقل مرة في الشهر. لو حاسس إن فيهم حشرات وقلقان يمكنك رشهم بمبيد  قبل الغسيل بيوم خارج البيت في البلكونة مثلا لضمان قتل أي حشرات.  اقرأ مكونات المبيد وابحث مدى خطورته على الإنترنت قبل الإستخدام. بعدها قم بالغسيل بالماء الدافئ والكثير من الصابون لضمان التنظيف الجيد والتخلص من بواقي المبيدات حفاظا على سلامة أسرتك


غسيل سرير وبطانية كلبك مهم 

 بشكل دوري في الغسالة بماء دافئ وصابون. يفضل الغسيل على الأقل مرة كل أسبوعين


  ولحماية نفسك استخدم طارد جيد مثل الأوف  ننصح إنك قبل مغادرة البيت أو الذهاب لحديقة ممكن يأتي منها حشرات إنك ترش نفسك وأفراد أسرتك بطارد يحتوي على مادة الديت وهي مادة طاردة قوية للحشرات الطائرة والطفيلية. اقرأ التعليمات  اللي على ظهر العبوة قبل الاستعمال.  لا تستخدمه على كلبك


عشان تعرف الطرق الآمنة لقتل القراد والبراغيث في الحدائق اضغط الرابط ده

نصيحة هامة : لو شاكك إن كلبك بلع أي حاجة سامة من مبيدات أو منظفات وشفت عليه اعراض زي القيء و الإسهال المزمن أو الارتعاش أو افراز زائد في اللعاب عليك بالآتي
في زجاجة أو وعاء قم بإذابة أقراص فحم في ماء بمقدار قرص لكل معلقتين صغيرتين من الماء وتدي للكلب معلقة صغيرة من هذا المحلول لكل كيلو جرام من وزنه ثم عدد 2 كوب ماء للشرب. المحلول ده يؤجل امتصاص الجسم للكيماويات أو السموم لكنه لن يوقفه. ده اسعاف أولي سريع تعمله على ماتوصل للطبيب البيطري


Leave a comment

2 thoughts on “

كيفية تطهير بيتك من القراد والبراغيث

  • Ola Elkarany
    Ola Elkarany

    من فضلكم انا معنديش كلاب ولا أي حيوانات خالص لكني بعاني من وجود قرادفي البيت من ساعة ما سكنت فيه ومعرفش مصدره إيه وكنت باستخدم مسحوق بوريك في مياه المسح لما كان ابني لسه مش بيتحرك لكنه دلوقتي بقى بيزحف ويمشي وطبعا مبقتش بقدر استخدمه تاني ودايما مش بشوف القراد غير على السيراميك او الحيطان يا ريت لو تفيدوني

    • Thedogsnetwork
      Thedogsnetwork Post author

      حضرتك جربتي تتبعي الخطوات اللي في المقالة دي ؟ لابد من إستخدام المكنسة الكهربائية في السجاد ، وننصح بإستخدام الخل المركز في ماء مسح الارضيات