ازاي تعالج كلبك من القراد والبراغيث


القراد والبراغيث معاناة كبيرة لمربي الكلاب. ساعات مع تكاثرهم على جسم الكلب أو داخل البيت أو الحديقة بنضطر نلجأ لحلول كتير منها سامة وبتمثل خطورة كبيرة على بيت فيه كلاب أو أطفال . ناس كتير بتلجأ للديازينون اللي اتمنع أصلا من بلاد كتير من 10 سنين نظرا لخطورته على الحيوانات والبني آدمين
في المقالة دي هنتكلم على كيفية القضاء على القراد والبراغيث. قبل ماتلجأ للحلول السامة جرب الحلول دي. الحلول الآتية بتتطلب مجهود ومواظبة لكنها مضمونة وآمنة. الديازينون ممكن يكون حل فوري لكنه خطر ومفيش شك في إنه سام وضار جدا لكلبك كنا اتكلمنا في مقالة سابقة عن كيفية تفادي القراد والبراغيث. المقالة دي هنتكلم على إيه الحلول اللي ممكن نلجأ ليها لو تفشت الحشرات دي في بيتك وده وارد جدا ومن الطبيعى إنه يحصل للبيوت اللي فيها كلاب ولا يستدعي القلق. المهم نعرف ازاي نقضي عليها. ودي أول مقالة من سلسلة مقالات هنتكلم فيها عن محاربة القراد والبراغيث

أول حاجة لازم نعملها هي معالجة الكلب بالخطوات الاتية
لو لقيت قرادة أو اتنين ده مش شيء مقلق. شيلهم بملقاط وأرميهم في برطمان مليان ماء مع صابون مواعين أو ماء مع ديتول و اقفل عليهم. صابون المواعين السائل أو الديتول قاتلين للحشرات دي وهتشوف بنفسك. ماتحاولش ترميهم في التواليت أو التخلص منهم تحت ماء الحنفية لأن الماء مش بيموتهم و غالبا هيرجعوا تاني
لو لاقيت على جسم كلبك قراد أو براغيت كتير عليك بالآتي
ماتلجأش للحمام الكيميائي
ما تحطش ديازينون على كلبك

 تخلص من القراد على جسم كلبك بالملقاط كما هو مشروح أعلاه مع  استخدام فرشة التسريح لأنها  بـتسهل عملية إيجاد القراد و البراغيث
ممكن تستعين بشامبو مضاد للحشرات الطفيلية وتتبع التعليمات الموضحة عليه. مع مراعاة عدم استخدامه كثيرا لانه ممكن يسبب حساسية. مرة في الشهر كفاية
ممكن استخدام قليل من صابون الأطباق السائل أثناء الاستحمام. بل جسم الكلب جيدا وبعدها ضع كمية من صابون المواعين المخفف  تكفي لعمل رغوة جيدة. قم بالتدليك مع استخدام فرشة التسريح جيدا ولمدة 5 دقائق على الأقل. بعدها أغسل الكلب جيدا من الرغوة وممكن تكرر العملية دي تاني بالبشامبو اللي بتستخدمه في العادي. في ناس بتضيف قليل من الخل مع صابون المواعين وده اختياري ممكن تعمله لو تحب. صابون المواعين قاتل للقراد والبراغيت وبالرغم من إنه حل كيميائي (مش من مواد طبيعية ) الا إنه أقل ضررا من الحلول السامة. ادي التجربة دي فرصة قبل اللجوء للحمام الكيميائي. مع مراعاة إن كلبك ممكن يكون حساس ليها .. جرب بكمية قليلة أولاً. ولا تكررها أكثر من مرة في الشهر. إقرأ المزيد عن تحميم كلبك
مهم جدا المواظبة على الدواء الشهري للحشرات مثل البارس أو الفرونت لاين. لكن عليك اتباع الاتي
يفضل قبل وضع الدواء بيومين أو يوم على الأقل تكون حميت كلبك بالشامبو اللي بتستخدمه أو بالصابون السائل كما هو مشروح أعلاه. الدواء لما تيجي تحطه لازم جسم الكلب يكون جاف تماما وبعد ماتحطه تحافظ على إنه يفضل جاف يومين بعدها. ده عشان نضمن مفعول جيد للدواء
النقط زي البارس مثلا توضع على رقبة الكلب من الخلف على الجلد مباشرة بالاضافة إلى نقطة وراء كل من الأذن. مهم الدواء يتحط في أماكن لا يستطيع الكلب الوصول ليها أو لحسها. ولا توضع النقط دي داخل الأذن
ممكن تعمل نظام انك أثناء فصل الصيف مرة كل شهر تغسل جسم كلبك بالشامبو قبل معاد الدواء بيومين
ملحوظة: ننصح بعدم استحمام الكلاب بالصابون أو الشامبو اكثر من مرة أو إتنين في الشهر بالكثير. لو محتاج تحميه أكثر عليك بإستخدام الماء فقط. الصابون والشامبو الكتير بيسبب ليهم حساسيات ومشاكل جلدية
يمكنك شراء طوق للحشرات وتلبسه لكلبك أثناء موسم الصيف. دي بتتجاب من أي محل لمستلزامات الحيوانات. شوف أقرب محل ليك من الرابط ده
ننصح كمان إنك تعمل خلطة طبيعية طاردة للحشرات ترش الكلب بيها قبل مغادرة البيت كل مرة. يجب مراعاة إنك ماتستعملش الرش ده قبل وبعد وضع الدواء الشهري بيومين عشان يفضل جاف
ممكن في عبوة رش تضع نص خل ونص ماء. ده لوحده طارد جيد للحشرات ومنظف طبيعي لشعر الكلب. أو ممكن تستخدم الوصفة المبينة في الفيديو

لمعرفة كيفية تطهير بيتك بطريقة آمنة من القراد والبراغيث اضغط الرابط ده

عشان تعرف الطرق الآمنة لقتل القراد والبراغيث في الحدائق اضغط الرابط ده
لو مضطر تستخدم مبيدات حشرية في الحدائق تعرف على كيفية استخدامهم بشكل آمن لأسرتك في الرابط ده

Leave a comment