تدريب الكلب على الحمام في المكان الصح


تدريب الكلب على الحمام  في المكان الصح

تدريب الكلب على الحمام في المكان الصح ممكن ياخد اسابيع وده شيء طبيعي لحد مايتم تدريبه بنجاح. في السن الصغير مابين شهرين إلى اربع شهور الكلب بالفطرة بيكون مش عايز يقضي حاجته في بيته لأنه بيكون عايز يخلي مكان اكله ونومه نظيف. الكلبة الأم بتدرب الجراوي على كده . وده من الأسباب اللي تخلينا نسيب الكلب مع أمه لغاية سن 3-4 شهور . المشاعر القوية عند الجرو زي الفرحة أو الخوف بتخليه ساعات مش عارف يتحكم في نفسه وبالتالي يقضي حاجته في الاماكن الخطأ

 

الحل الأمثل هو عدم اتاحة اماكن مؤقتة لقضاء الحاجة داخل المنزل أو في البلكونة

طب ازاي ندرب الكلب على قضاء حاجته خارج المنزل ؟ ببساطة خلي دايما معاك تريتس تكافؤه بيها لما يعمل بره البيت
حسب الاوقات المبينة.. اعمل نظام إنك تخرجه بره البيت لقضاء حاجته

جدول احتياج الكلاب لقضاء الحاجة بالسن

الجراوي الصغيرة تحت 3 شهور بتحتاج تعمل حمام تقريبا كل ساعتين
الجراوي من سن 3-4 شهور بتحتاج كل 3 ساعات تقريبا
لما يوصلوا لسن 5-6 شهور بيحتاجوا يقضوا حاجتهم كل 4 ساعات تقريبا
مع الأخذ في الاعتبار أن الاوقات اللي الكلب بيحتاج يروح فيها الحمام بتكون لما يصحى من النوم أو بعد الأكل بحوالي 10-30 دقيقة

طريقة التدريب المثالية هي بالمكافأة ومش بالعقاب أو الزعيق

اهم حاجة لما الجرو يغلط أثناء فترة التدريب بلاش اللجوء للعقاب. بلاش نخلِّي الكلب يربط مابين احتياجاته الفسيولوجية بردود افعال سلبية . لما يغلط خليك هادي وتجاهل الموقف . ولما يعمل حمام في المكان الصح اديله مكافأة . بالطريقة دي هيكون حافز ليه يعمل الحاجة الصح في المكان والوقت الصح

 أثناء النوم بالليل

ينصح باستخدام قفص للجرو الصغير أثناء فترة النوم . أظبط المنبه على الاوقات المذكورة فوق لقضاء الحاجة حسب السن . خد كلبك بالخارج في وقت دخول الحمام واديله مكافأة لما يعمل بره . هو مجهود كبير في الأول على صاحب الكلب بس هتكون النتيجة ناجحة لما يكبر

التنظيف

أفضل طريقة ينصح بيها هي التنظيف بالخل لإنه بيقضي تماما على الرائحة. المشكلة في منظفات البيت العادية إنهم مش بيقضوا على الريحة .. هما بس بيغطوها .. مع الاسف الكلب غريزته بتقوله يعمل حمام في المكان اللي يشم فيه ريحة مكان عمل فيه قبل كده . الخل أفضل حاجة للقضاء تماما على الريحة والتنظيف وكمان امن مع وجود حيوانات اليفة واطفال في البيت
جهز ازازة رش فيها نص ماء ونص خل مع قليل من صابون غسيل الاطباق. وخلي الازازة دي قريبة ومتاحة للتنظيف السريع وقت اللزوم

Leave a comment